BE, çështje gjyqësore për AstraZeneca. Kërkon llogari për paratë që i ka dhënë kompanisë për vaksinën
Komisioni Europian po punon për një procedurë ligjore kundër AstraZeneca, pasi kompania shkurtoi dërgesat e vaksinave të Covid-19 tek Bashkimi Europian, sipas burimeve për Reuters. Lëvizja shënon një tjetër hap në planin e BE për të prishur marrëdhëniet me prodhuesin e barnave anglo-suedez, që ka shkaktuar vonesa të mëdha në programet e vaksinimit në kontinent. Lajmi mbi procedimin ligjor u raportua fillimisht nga e përditshmja Politico, e më pas u konfirmua nga një zyrtar i përfshirë në bisedime me kompaninë.
Brukseli dërgoi në muajin Mars një letër ligjore tek kompania, ç’ka ishte hapi i parë i një padie të mundshme. Kur afati për kthimin e përgjigjes skadoi këtë muaj, një zëdhënës i komisionit tha se çështja është diskutuar në një takim me AstraZeneca, por që BE po synon ende detaje nga kompania për shumë pika të konfliktit. Brukseli ka vënë në pikëpyetje gjithashtu se si AstraZeneca ka shpenzuar mbi 224 milionë euro të dhëna nga BE në Shtator për të blerë ingredientë të vaksinës, për të cilat kompania nuk ka ofruar dokumente që konfirmojnë blerjet. Sipas kontratës, kompania është angazhuar për të dërguar 180 milionë doza të vaksinës në Europë në tremujorin e dytë, në një total prej 300 milionë në periudhën Dhjetor – Qershor. Kompania ka deklaruar më 12 Mars se synon të dërgojë vetëm 1/3 e kësaj shifre.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.