BE do të rishikojë vaksinën e Oksfordit. Pritet një vendim këtë muaj për t’u bërë “arma” e tretë kundër Covid-19
Rregullatori i barnave në Europë do të rishikojë vaksinën e AstraZeneca me Universitetin e Oksfordit këtë muaj, pasi kompania britanike dorëzoi një aplikim për miratim me kusht, sipas organit rregullator. Agjencia Europiane e Barnave bëri të ditur se do të vlerësojë me shpejtësi aplikimin dhe mund të marrë një vendim mbi autorizimin e kushtëzuar të marketingut më 29 Janar. Nëse miratohet nga Agjencia dhe më pas zyrtarisht nga Komisioni Europian, vaksina e AstraZeneca do të bëhej arma e tretë kundër koronavirusit të ri në kontinent, pas Pfizer dhe Moderna.
Agjencia deklaroi gjithashtu se gjatë studimit të vaksinës, ka vlerësuar të dhëna nga provat në Brazil, Britani dhe Afrikën e Jugut. Rregullatori po studion gjithashtu informacion shtesë të ofruar nga AstraZeneca. Autorizimi i Kushtëzuar i Marketingut i Bashkimit Europian, lejon që një trajtim të shitet për 1 vit në 27 vendet anëtare, përpara se të gjithë të dhënat e nevojshme mbi efikasitetin dhe efektet anësore të jenë të disponueshme. Vaksina e AstraZeneca është miratuar në vende përfshirë Argjentinën, Britaninë, El Salvador dhe Indinë. Brazili pritet të vendosë gjithashtu këtë Javë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.