BE i jep “faturën” Amazon – Përjashtim i padrejtë tatimor, duhet të paguajë 250 mln euro

Bashkimi Europian urdhëroi shitësin online me pakicë më të madh në botë, Amazon, për të paguar 250 milionë euro në taksa drejt Luksemburgut, për shkak se i është dhënë avantazh i padrejtë tatimor që prej vitit 2003.

Duke i’u bashkuar gjigantëve të tjerë të teknologjisë në SHBA që shqyrtohen nga shefja e konkurrencës së Bashkimit Europian Margrethe Vestager, Amazon deklaroi se po konsideron një apelim për këtë pagesë,  pavarësisht se shuma është më e vogël se ç’pritej dhe eklipsoet nga gjoba e Apple prej 13 miliardë eurosh.

“Luksemburgu i ka dhënë përfitime të jashtëligjshme tatimore Amazon. Për rrjedhojë, thuajse 75% e fitimeve të amazon nuk janë tatuar”, tha Komisionerja e Konkurrencës Vestager.

Luksemburgu, që ka përfituar nga ofrimi i mikpritjes drejt Europës për kompanitë multinacionale, e refuzoi këtë zbulim dhe zyrtarët deklaruan se po shohin për opsionet ligjore.

Shuma prej 250 milionë euro është shumë më e vogël se 400 milionë që vlerësohej fillimisht.

Komisioni deklaroi se Luksemburgu ka lejuar Amazon që të kanalizojë një përqindje të madhe të fitimeve drejt një kompanie tjetër, pa paguar taksa.

Kompania tjetër ishte e lejuar për ta bërë këtë për shkak se mbante të drejta të veçanta të pronës intelektuale.

Amazon ka një staf prej 50,000 punonjësish në Europë dhe është një nga punëdhënësit më të mëdhenj në Luksemburg me një staf prej 1,500.

“Ne mendojmë se Amazon nuk ka marrë asnjë trajtim special nga Luksemburgu dhe ne kemi paguar taksat në përputhje me ligjin për taksat Ndërkombëtare dhe ato të Luksemburgut”, deklaroi Amazon pas lajmërimit.

Presidenti i Komisionit Europian, Jean Claude-Juncker ka qenë Kryeministër i Luksemburgut  për thuajse 2 dekada deri në 2013-ën dhe është kritikuar për rolin e tij, duke lejuar këto marrëveshje tatimore që po shqyrtohen së fundmi.

Luksemburgu është gjithashtu nën mbikëqyrje për marrëveshje të tjera tatimore me McDonald’s dhe kompaninë franceze të energjisë “Engie”.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.