BE jep 90 milion euro ndihma makro-financiare për Shqipërinë / Fondi në trajtim të pasojave ekonomike të shkaktuar nga pandemia
Nëpërmjet një njoftimi të publikuar në faqen zyrtare të Bashkimit europian në Shqipëri është bërë me dije se gjatë ditës së sotme Komisioni Evropian ka disbursuar 90 milionë euro në ndihmë makro-financiare për Shqipërinë.
“Ky disbursim është një tjetër demonstrim i solidaritetit të BE-së me popullin shqiptar. Urova ministren Delina Ibrahimaj dhe inkurajova qeverinë shqiptare të ruajë fokusin tek integrimi në BE dhe të forcojë zbatimin e reformave që janë thelbësore për qytetarët shqiptarë,” njoftoi Ambasadori i BE-së Luigi Soreca.
Kjo pagesë është pjesë e paketës NMF të emergjencës prej 3 miliardë euro për partnerët e zgjerimit dhe fqinjësisë, e cila synon t’i ndihmojë ata të kufizojnë pasojat ekonomike të pandemisë COVID-19. Programi është një demonstrim konkret i solidaritetit të BE-së me partnerët e saj, për t’i ndihmuar ata që t’i përgjigjen ndikimit ekonomik të pandemisë COVID-19.
Me disbursimin e sotëm, BE-ja ka përfunduar tetë nga 10 programet NMF të paketës NMF prej 3 miliardë eurosh për COVID-19 dhe ka derdhur këstet e para për të gjithë partnerët.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.