BE, Juncker pret që Trump ti përmbahet zotimit – “Jo tarifa më të larta për makinat”
Presidenti i Shteteve të Bashkuara të Amerikës Donald Trump i ka premtuar Presidentit të Komisionit Europian, Jean-Claude Juncker se ai nuk do të imponojë tarifa shtesë ndaj importit të makinave europiane për momentin.
“Trump më dha fjalën e tij se për momentin nuk do të ketë asnjë tarifë shtesë për ndaj makinave. Unë e shoh këtë zotim si diçka për të cilën mund të mbështetemi”, tha Juncker në një intervistë për të përditshmen gjermane Stuttgarter Zeitung.
Megjithatë, nëse Trump imponon tarifa për makinat evropiane, BE do të reagojë menjëherë dhe nuk do të ndihej e detyruar të përmbushte premtimin e saj për të blerë më shumë sojë dhe gaz të lëngshëm nga Shtetet e Bashkuara, shtoi Juncker.
E.Z/SCAN
Lexo edhe këtë: Trump merr raportin e makinave – Industria pret tarifa. I paraprin veprimeve duke paralajmëruar
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.