BE merr në dorë kufirin shqiptar – Frontex fillon punën. Avramopulous: Fazë e re bashkëpunimi Shqipëri-BE
Kufijtë e Republikës së Shqipërisë tanimë do të patrullohen dhe nag agjentët e frontex, agjencia europiane për ruajtjen e kufijve. Kjo bën që Shqipëria të jetë shteti i parë jashtë Bashkimit Europian me të cilën Frontex ka një marrëveshje bashkëpunimi. Gjatë ceremonisë zyrtare të fillimit të punës, Komisoneri Europian për migrimin, Avramopulous u shpreh se një etapë e re bashkëpunimi ka nisur mes Tiranës zyrtare dhe Brukselit.
“E dimë që sot jemi këtu për të celebruar një ngjarje të rëndësishme një etapë të re për Shqipërinë e BE. 6 muaj më parë në Tiranë nënshkrova marrëveshjen këtë marrëveshje statusore me këtë komb të madh për menaxhimin e kufirit. Kjo marrëveshja është e para dhe e vetmja e këtij lloji, desha ta theksoj është operacioni i parë në botë, me një vend jo shtet anëtar të BE. Kjo jo vetëm shënon një fazë të re mes BE e ballkanit por është edhe një hap më tej drejt operacionalizimit të agjensisë. Mënyra e vetme është të punojmë ngushtësisht së bashku si fqinj e partner. Ajo që ndodh në Shqipëri e Ballkan prek BE e anasjelltas. Siguria e qytetarëve është në qendër të vëmendjes tonë. Shqipëria është vendi i parë në Ballkan me të cilin BE po shkon para me këtë kaputull të ri. Është një hap i rëndësishëm që na bashkon më shumë. Duhet të jemi vigjilentë. Marrëveshja statusore, do na ndihmojë në këtë përpjekje. Shqipëria është pjesë e familjes europiane, sfidat i kemi të përbashkëta, ato nuk njohin kufij.” –tha Avramopulous.
Nga ana tjetër, Kryeministri Rama radhiti disa nga përfitimet e Shqipërisë nga kjo marrëveshje.
“Nisja e zbatimit të këtij projekti, një marrëveshje që e bën Shqipërinë vendin e parë të Ballkanit, që do të patrullojë kufijtë e jashtëm përbën një arsye për të qenë të vetëdijshëm se sa e rëndësishmen është që të kemi sukses edhe në funksion të zgjerimit të mëtejshëm. Përfitimet në fakt janë disa, sepse marrëveshja i hap rrugë bashkëpunimit në informacion dhe analizën e fluksit si dhe përballimit të fluksit nga vendet migratore nga vendet e treta. Shqipëria është përballur me një rritje të flukseve të migracionit 6.7 herë më shumë në 2018 krahasuar me vitin 2017. Ne nuk jemi një vend ku ata që vijnë nuk shihen si rrezik apo problem, për arsye të traditës sonë”. – tha Rama.
Kështu janë rreth 50 oficerë të Frontex të cilët do të shpërngulen në kufijtë shqiptarë, dhe kufiri që do të monitorohet do të jetë ai mes vendit tonë dhe Greqisë, duke qenë se kjo e fundit është i vetmi fqinj territorial, anëtar i Bashkimit Europian.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.