BE ngrin asetet e shefit të Sberbank dhe vajzave të Putin!

Bashkimi Europian ka rënë dakord të ngrijë asetet në BE të shefit të huadhënësit kryesor të Rusisë Sberbank, dy vajzave të Vladimir Putinit dhe më shumë oligarkëve, sipas një dokumenti të botuar në revistën zyrtare të BE-së të premten.

Që nga fillimi i luftës në Ukrainë, BE ka futur në listën e zezë rreth 700 persona të lidhur me Kremlinin ose të akuzuar për mbështetjen e pushtimit, të cilin Moska e quan një “operacion special”. Megjithatë, kjo jo gjithmonë ka çuar në një ngrirje të shpejtë të aseteve, mes pengesave ligjore dhe ndonjëherë mungesës së vullnetit politik.

Masat e reja do të godasin mbi 200 individë të tjerë, kryesisht nga rajonet separatiste të Luhansk dhe Donetsk, si dhe biznesmenë të lartë, politikanë dhe staf ushtarak pranë Kremlinit. 18 njësi të tjera janë goditur gjithashtu nga ngrirja e aktiveve, duke përfshirë katër banka, si VTB dhe firma ushtarake, duke dyfishuar pothuajse numrin e kompanive të goditura nga sanksionet që nga fillimi i luftës.

Herman Gref, kreu i Sberbank, është shtuar në listën e zezë të BE-së, sipas dokumentit, në një veprim që është simbolikisht i rëndësishëm. BE-ja është përmbajtur deri më tani nga sanksionimi i bankës, e cila luan një rol kyç në pagesat e energjisë. Vajzat e Putin, Ekaterina Tikhonova dhe Maria Vorontsova, gjithashtu janë sanksionuar për përfitime nga qeveria ruse, thuhet në dokument.

Putin ishte sanksionuar tashmë në një raund të hershëm masash kufizuese, megjithëse është e paqartë se sa asete, nëse ka, ai dhe familja e tij zotërojnë në BE. Oligarkët e pasur zakonisht përdorin drejtues ose kompani anonime guacka dhe truste për të mbrojtur asetet e tyre, duke e bërë shumë të vështirë nëse jo të pamundur për hetuesit t’i identifikojnë ato, veçanërisht në juridiksione me rregulla të dobëta për pronarët përfitues të kompanive.

Ekzekutivi i kompanisë së naftës Surgutneftegas, Vladimir Bogdanov, themeluesi i gjigantit të aluminit Rusal, Oleg Deripaska, miliarderi Boris Rotenberg, aksioneri kryesor në minierën më të mirë të arit në Rusi Polyus Said Kerimov dhe shefi i platformës ruse të tregtisë elektronike Ozon Alexander Shulgin janë sanksionuar gjithashtu. Listimet e reja janë pjesë e paketës së pestë të sanksioneve të BE-së kundër Rusisë, të cilat përfshijnë një ndalim të importeve të qymyrit dhe kufizime për hyrjen në BE për anijet dhe kamionët rusë. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.