BE nxit SHBA që të eksportojnë vaksina – Leyen: Vetëm prodhimi i lartë, eksporti dhe ndarja e vaksinave mund ta luftojnë pandeminë
Komisioni Europian u bëri thirrje Shteteve të Bashkuara dhe prodhuesve të tjerë të mëdhenj të vaksinave COVID-19 të bëhen pjesë e fushatës së eksportimit siç bën Bashkimi Evropian, në vend që të flasin në media për heqjen dorë nga të drejtat e pronësisë intelektuale.
Kreu i komisionit Ursula von der Leyen tha se diskutimet mbi heqjen dorë të pronësisë intelektuale nuk do të prodhonin një dozë të vetme të vaksinës COVID-19 në një periudhë afatshkurtër dhe afatmesme.
“Ne duhet të jemi të hapur për të udhëhequr këtë diskutim. Por kur e drejtojmë këtë diskutim, duhet të ketë një pamje 360 gradë mbi të, sepse ne kemi nevojë për vaksina tani për të gjithë botën,” tha ajo, duke shtuar se Bashkimi Evropian është rajoni i vetëm kontinental ose demokratik i kësaj bote që po eksporton në shkallë të gjerë.
Leyen tha se rreth 50% e vaksinës së koronavirusit të prodhuar në Evropë eksportohet në pothuajse 90 vende, duke përfshirë ato në programin COVAX të mbështetur nga Organizata Botërore e Shëndetësisë.
Vetëm prodhimi më i lartë, heqja e pengesave të eksporteve dhe ndarja e vaksinave të porositura tashmë mund të ndihmojë menjëherë në luftimin e pandemisë sa më shpejt.
Von der Leyen bëri me dije se Bashkimi Evropian kishte filluar mekanizmin e tij të ndarjes së vaksinave, duke përmendur si shembull shpërndarjen e 615,000 dozave në Ballkanin Perëndimor.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.