BE reagon ndaj Bjellorusisë. Do të sanksionojë 31 zyrtarë të lartë prej manipulimit të zgjedhjeve
Bashkimi Europian synon të vendosë sanksione ekonomike ndaj 31 zyrtarë të lartë të Bjellorusisë deri në mes të muajit Shtator, në kundërpërgjigje të zgjedhjeve të 9 Gushtit, që sipas perëndimit ishin të manipuluara. BE kërkon të ndëshkojë manipulimin dhe mbështet zgjedhje të reja, pasi presidenti Aleksander Lukashenko pranoi fitoren për të zgjatur sundimin e tij 26-vjeçar. Sipas diplomatëve europianë për Reuters, fillimisht u ra dakord për 14 emra politikanësh, por shumë shtete europiane menduan se nuk ishte mjaftueshëm dhe shtuan 17 të tjerë.
Ministrat e Jashtëm të BE, dhanë miratimin politik për sanksionet, që përfshin ndalim të udhëtimit në Europë dhe ngrirje të aseteve. Greqia dhe Qipro, që po përpiqen të bindin BE për sanksione të tjera ndaj Turqisë, nuk kanë dhënë ende mbështetjen ndaj listës së Bjellorusisë. Të gjithë 27 vendet duhet të bien dakord për masa të tilla dhe Greqia me Qipron mund të përdorin mundësinë, për të marrë në këmbim masa të ashpra ndaj Turqisë. Lituania, Letonia dhe Estonia vendosën sanksionet e veta ndaj zyrtarëve të Bjellorusisë në fund të Gushtit.
Ministri i brendshëm, Yuri Karaev dhe zëdhënësi i tij, pritet të jenë në listën e BE, së bashku me zyrtarë të komisionit të zgjedhjeve, sigurisë, drejtësisë dhe ministra. Ndryshe nga lista e vendeve të Baltikut, Lukashenko nuk do të sanksionohet. Gjermania kërkon më shumë kohë për dialog dhe ka lënë të hapur mundësinë për të shtuar emrin e presidentit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.