BE refuzon ultimatumet e Iranit – Kërkojnë respektimin e marrëveshjes bërthamore, pavarësisht sanksioneve
Shtetet Europiane bënë të ditur se kërkojnë të ruajnë marrëveshjen bërthamore të Iranit dhe refuzuan “ultimatumet” nga Teherani, ndërkohë që Irani kërcënoi lëvizje që e thyejnë këtë pakt. Irani lajmëroi se do të heqë barrierat ndaj programit bërthamor, në përgjigje të sansksioneve të reja amerikane, pasi Washingtoni e braktisi marrëveshjen 1 vit më parë.
Ekspertët shprehen se lëvizjet e reja të Teherani, nuk prishin kushtet e marrëveshjes menjëherë. Megjithatë, presidenti Hasan Rouhani, tha se nëse fuqitë botërore nuk gjejnë një mënyrë për të mbrojtur industritë bankare dhe të naftës nga sanksionet amerikane brenda 60 ditëve, Irani do të nisë rritjen e pasurimit me uranium përtej limiteve që lejohet në marrëveshje.
“Ne refuzojmë ultimatumet dhe do të vlerësojnë respektimin e angazhimeve të Iranit ndaj marrëveshjes bërthamore të vitit 2015 dhe traktatit të mos prodhimit të armëve bërthamore NPT”, deklaroi Bashkimi Europian së bashku me minsitrat e jashtëm të Britanisë, Francës dhe Gjermanisë.
Europianët bënë gjithashtu të ditur se kundërshtojnë sanksionet e Shteteve të Bashkuara dhe shtojnë se do të angazhohen në ruajtjen e marrëveshjes bërthamore të Iranit. “Ne jemi të angazhuar në vazhdimin e tregtisë së ligjshme me Iranin”, deklaruan shtetet europiane, duke shtuar se këtu përfshihet krijimi i një mekanizmi të veçantë që synon biznesin me vendin.
Marrëveshja bërthamore e vitit 2015 i kërkon iranit që të frenojë aktivitetet bërthamore në mënyrë që të hiqen sanksionet ndërkombëtare. Marrëveshja u nënshkrua nga Shtetet e Bashkuara, Britania, Franca, Gjermania, Rusia dhe Kina.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.