BE, transfertat në euro – Komisioni propozon uljen e tarifave edhe për vendet jo-anëtare të Eurozonës
Komisioni Europian ka propozuar uljen e tarifave për transfertat në euro përtej kufijve në të gjithë Bashkimin Europian. Konsumatorët dhe bizneset në Eurozonë përfitojnë tarifa tejet të ulëta prej prezantimit të rregullores së pagesave përtej kufijve në vitin 2001.
Nën rregullat aktuale, banorët apo bizneset ndërmarrin transaksione në euro me vendet anëtare të Eurozonës si të ishin brenda vendit të tyre. Propozimi i Komisionit synon ta zgjerojë këtë përfitim edhe për konsumatorët dhe bizneset në vendet e BE që nuk janë ende anëtarë të Eurozonës.
Lëvizja pritet të reduktojë fitimet për bankat jashtë bllokut të valutës, ndërkohë që sektori përballet me konkurrencë nga firmat e teknologjisë financiare.
“Me propozimin e sotëm, ne po i ofrojnë qytetarëve në vendet që nuk janë anëtare të Eurozonës të njëjtat kushte si banorëve të bllokut të valutës së përbashkët kur kryejnë pagesa në euro”, tha Valdis Dombrovskis, zv/Presidenti i Komisionit.
Krahu ekzekutiv i BE bëri të ditur gjithashtu se do të sjellë më shumë transparencë në pagesat që përfshijnë valutat e tjera të Bashkimit Europian.
Sipas Komisionit, aktualisht konsumatorët nuk janë të informuar mbi koston e transaksionit që përfshihet në konvertimin e valutës. Nëpërmjet propozimit ata do të jenë informuar plotësisht, në mënyrë që të krahasojnë kostot e opsioneve të ndryshme të konvertimit përpara se të bëjnë zgjedhjen e tyre.
Mungesa e informacionit bën që konsumatorët të përballen me opsionin më të shtrenjtë të konvertimit të valutës.
“Propozimi do të kërkojë gjithashtu transparencë të plotë në konvertimin e valutës kur konsumatorët paguajnë me kartë në një vend që nuk ka të njëjtën valutë me to”, shtoi Valdis Dombrovskis.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.