BE zyrtarisht në ‘betejë’ ligjore me AstraZeneca – “E pabesë karshi kontratës”
Bashkimi Evropian thotë se ka filluar veprime ligjore kundër AstraZeneca mbi pretendimin e shkeljes së kontratës në lidhje me shpërndarjen e vaksinave.
“Komisioni Evropian ka filluar veprimin ligjor të Premten e kaluar kundër kompanisë AstraZeneca mbi bazën e shkeljes së marrëveshjes së blerjes,” tha një zëdhënës nga Komisioni Evropian.
AstraZeneca ishte zotuar të furnizonte 180 milion doza në BE në tremujorin e dytë të këtij viti por është përballur me vonesa të shumta të dërgesave. Zyrtarët e BE kanë akuzuar kompaninë se nuk ka përmbushur zotimin e saj.
“Kompania nuk ka qenë në gjendje të dalë me një strategji të besueshme për të siguruar shpërndarjen në kohë të dozave. Ajo që ka rëndësi për ne, në këtë rast, është që ne duam të sigurohemi që të ketë një shpërndarje të shpejtë të një numri të mjaftueshëm të dozave që kanë të drejtë qytetarët evropianë dhe që janë premtuar në bazë të kontratës,” vazhdoi zëdhënësi.
Muajin e kaluar, Presidentja e Komisionit Evropian Ursula von der Leyen akuzoi AstraZeneca për “nën-prodhim “.
Në atë kohë, ajo tha se BE po priste të merrte 70 milion doza vaksinash nga prodhuesi i ilaçeve, shumë më pak sesa pritej.
D.B – SCAN
Burimi: Euronews
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.