Beogradi ‘paralizohet’ nga qindra kërcënime me bombë!

Kryeqyteti i Serbisë u vu në shënjestër nga një mori kërcënimesh me bombë të hënën, ka thënë policia e vendit. Kërcënimet u bënë kundër shkollave, urave, qendrave tregtare, restoranteve, kopshtit zoologjik të qytetit dhe në një ndeshje futbolli, duke e ndalur trafikun në orët e pikut në Beograd.

Policia tha në një deklaratë se nuk u gjet asnjë pajisje shpërthyese pas më shumë se 90 kërkimeve të ndryshme dhe nuk ishte menjëherë e qartë se kush qëndron pas kërcënimeve të supozuara me email.

Gati 100 shkolla fillore u evakuuan pas kërcënimeve, si dhe disa restorante, duke përfshirë një dyqan McDonald’s dhe qendrat tregtare, kopshtin zoologjik, aeroportin e qytetit, stacionet hekurudhore dhe kompaninë e furnizimit me ujë.

Në shënjestër të një kërcënimi me bombë ka qenë edhe ambasada ruse, raportojnë mediat lokale. Një ndeshje futbolli e divizionit të lartë u shty gjithashtu pasi policia kontrolloi stadiumin. “Edhe pse kërcënimet duken të rreme, ne nuk duhet t’i marrim lehtë,” tha zëvendëskryeministri i parë Branko Ružić.

Linja ajrore kombëtare Air Serbia është përballur me një seri të vazhdueshme kërcënimesh me bomba në fluturimet e saj drejt Moskës në muajt e fundit pasi ishte e vetmja kompani europiane, përveç transportuesve turq, që mbante fluturime të rregullta drejt Rusisë, pavarësisht një embargoje të fluturimeve perëndimore.

Serbia mbetet një nga disa vende europiane që nuk kanë vendosur asnjë sanksion kundër Kremlinit për pushtimin e Ukrainës më 24 shkurt. Ministri i Brendshëm i Serbisë Aleksandar Vulin pohoi se vendi është “objektiv i një lufte speciale që vjen nga adresa të ndryshme europiane”. AP

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.