Berlini vë veton – Nuk ka lehtësim të borxhit grek deri në 24 shtator
Eurogrupi po vlerëson të gjitha mundësitë për t’i dhënë një zgjidhje problemit grek. Palët duket se kanë rënë dakord për të zhbllokuar paratë për Athinën, por jo për borxhin, që është edhe problemi numër një.
Europa, mesa duket ka vendosur që të shtyjë deri pas zgjedhjeve në Gjermani lehtësimin e borxhit helen. Në rast se kjo konfirmohet në 15 Qershor, atëherë reagimet do të jenë të ashpra. Veç Greqisë, një sërë drejtuesish të rëndësishëm të institucioneve ndërkombëtare dhe europiane kanë bërë apel për lehtësimin e borxhit helen. Ngërçi vjen si pasojë e përplasjes mes Berlinit dhe Fondit Monetar Ndërkombëtar.
Kjo përplasje vijon prej kohësh, por tashmë pritet të materializohet dhe të bjerë në kurriz të Greqisë. Athina zyrtare ka ndërmarrë një sërë masash të reja shtrënguese; 4 miliardë euro shkurtime vetëm javët e fundit. Mungesa e një marrëveshje për borxhin përkthehet në mospërfshirje të Greqisë në tregjet ndërkombëtare të borxhit dhe skemën e Bankës Qendrore Europoiane të lehtësimit sasior.
Berlini nuk ka ndërmend t’i bëjë asnjë dhuratë Greqisë deri në zgjedhjet e 24 shtatorit, ndërkohë që Uashingtoni nuk ka ndërmend të japë më asnjë qindarkë pa lehtësim të borxhit. Burime brenda Eurogrupit bëjnë me dije se, Parisi zyrtar ka bërë presion deri në moment të fundit për një marrëveshje, por Berlini mësohet se e ka ndarë mendjen.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.