BERZH, mbështetje për sektorët ekonomikë- Denaj: Mbështetja kryesisht për turizmin dhe infrastrukturën
Ministrja e Financave dhe Ekonomisë, Anila Denaj priti në një takim Presidentin e Bankës Europiane për Rindërtim dhe Zhvillim. Pas takimit, Denaj konfirmoi mbështetjen e BERZH për programet e investimeve në turizëm dhe infrastrukturë.
Banka Europiane për Rindërtim dhe Zhvillim do të vijoj të mbështesë qeverinë shqiptare për zhvillimin e disa sektorëve në ekonomi si Turizmi dhe infrastruktura. Ministrja e Financave dhe Ekonomisë, Anila Denaj konfirmoi këtë mbështetje pas takimit të zhvilluar me presidentin e BERZH, Suma Chakrabarti.
“BERZH ka treguar angazhim në këto sektorë dhe këtë angazhim e ka bërë nëpërmjet zhvillimit të portofolit të tij si në sektorin publik, me projekte në infrastrukturë, ashtu dhe në sektorin privat, sidomos me mbështetjen që i ka dhënë bizneseve në mënyrë të drejtpërdrejtë, por edhe nëpërmjet mbështetjes që i ka bërë këtyre të fundit në akses në financë, në marrjen e kredive, me kushte më të mira dhe me superimin e problemit që ekziston te garancia nëpërmjet programeve të mbështetjes me fonde garancie, ku dhe qeveria shqiptare është e angazhuar në një prej tyre, në atë në bujqësi, në programin e 180 milionë eurove të cilin ne e kemi lançuar në 2016-ën, u shpreh Ministrja Denaj.
Ministrja Denaj shtoi se angazhim do të ketë edhe për përmirësimin e arsimit profesional në vendin tonë, duke e çuar atë në një nivel më të lartë.
“Ne jemi duke punuar si qeveri shqiptare në shkollat profesionale në disa drejtime, por në fushën e turizmit dhe të bujqësisë BERZH kërkon të angazhohet më shumë edhe në krijimin e një strukture më të qëndrueshme për bizneset, ajo që është forca punëtore, e cila të jetë jo vetëm e qëndrueshme, por të jetë dhe e aftë dhe kjo aftësi të mbështetet me programe suporti dhe nga BERZH”, tha Ministrja Denaj.
Presidenti i Bankës Europiane për Rindërtim dhe Zhvillim vlerësoi bashkëpunimin e deritanishëm me autoritetet shqiptare dhe shprehu gatishmërinë që ky bashkëpunim të forcohet akoma më tej.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.