BERZH ul parashikimet për ekonomitë – Lufta në Ukrainë “zhvlerëson” projeksionet e marsit. Shqipëria do të rritet 3% këtë vit!

Një ndalesë e menjëhershme e eksporteve të gazit rus mund të bëjë që ekonomitë europiane në zhvillim, Azinë Qendrore dhe Afrikën e Veriut të bien në nivelet e PBB-së para pandemisë, paralajmëroi Banka Europiane për Rindërtim dhe Zhvillim.

Shumë vende në rajonin e operimit të BERZH, i cili mbulon rreth 40 ekonomi që shtrihen nga Mongolia në Slloveni dhe Tunizi, varen nga gazi rus dhe një ndërprerje e papritur e furnizimeve do të ulte prodhimin për frymë me 2.3% këtë vit dhe 2% në 2023.

Huadhënësi vlerëson se ekonomitë në të gjithë rajonet që mbulon u rritën me 6.7% vitin e kaluar, pas një tkurrjeje prej 2.5% në vitin 2020, kur COVID-19 tronditi ekonominë globale dhe tregjet financiare. Por, Moska e ka mbyllur tashmë fluksin e gazit në Poloni dhe Bullgari dhe tregjet janë përqendruar në ndikimin e një embargoje të BE-së ndaj naftës ruse, si dhe në mënyrën se si gazi do të paguhet sipas afateve më vonë këtë muaj nëpërmjet një mekanizmi pagese ruse.

Ndërprerja e flukseve të gazit do t’i jepte goditjen më të madhe ekonomive anëtare të BE-së me importe të konsiderueshme gazi nga Rusia dhe një varësi të madhe, si Republika Çeke, Hungaria dhe Sllovakia, paralajmëroi BERZH. Ekonomistët e institucionit financiar gjithashtu ulën perspektivën e tyre për vitin 2023 në 4.7% nga vlerësimi 5% në mars, duke përmendur presionet e çmimeve.

“Rritjet e fundit në çmimet e ushqimeve dhe energjisë shtuan presionet inflacioniste, të cilat ishin të larta për shkak të rimëkëmbjes së kërkesës globale pasi kufizimet e COVID-19 po hiqeshin gradualisht,” thuhet në raport.

Inflacioni lartë ka rritur presionin mbi ekonomitë më të dobta si Maqedonia e Veriut, Maroku, Egjipti dhe Jordania, ku ushqimi përfaqëson më shumë se 25% të indeksit të çmimeve të konsumit. Inflacioni mesatar në rajonet e BERZH-it arriti në 11.9% në mars 2022, duke iu afruar niveleve të vitit 2008.

Sipas BERZH, ekonomia e Shqipërisë do të rritet në 3% për këtë vit, ose 0,3% më pak krahasuar me parashikimet e bëra në mars, si dhe 3,2% për vitin e ardhshëm. Ekonomia e Ballkanit perëndimor projektohet në rritje 3,2% në vitin 2022 dhe 3,6% vitin e ardhshëm. PBB-ja e Ukrainës ishte parashikuar të tkurret 30% në 2022, në vend të një rënie vjetore prej 20% që pritej dy muaj më parë, ndërsa ekonomia e Rusisë pritet të tkurret 10%.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.