Bezos humbet vendin e dytë – Pasuria e tij tkurret me $2.6 mld në një ditë
Jeff Bezos nuk është më njeriu i dytë më i pasur në botë, dhe për të humbur këtë pozicion iu deshën më pak se 24 orë. Ditën e Premte, aksionet e kompanisë që ai vetë themeloi, “Amazon”, ranë me plot 3%.
Kjo rënie përkthehet në një humbje prej 2.6 miliardë dollarësh për pasurinë e miliarderit. Jeff Bezos është një ndër njerëzit që ka parë pasurinë e tij të rritet me ritme të frikshme. 53 vjeçari ka rritur pasurinë e tij me 64.2 miliardë dollarë që prej vitit 2012, dhe në mars të këtij viti kapërceu për herë të parë nivelin e 80 miliardë dollarëve.
Bezos tashmë ka një pasuri prej 83.9 miliardë dollarësh dhe ka zbritur në vendin e tretë të klasifikimit të njerëzve më të pasur të globit. Vendin e parë vijon ta mbajë i pathyeshmi Bill Gates, themelues i Microsoft, ndërkohë që tashmë në vend të dytë është ngjitur Amancio Ortega, biznesmeni spanjoll i cili njihet më së shumti për rrjetin e dyqaneve të veshjeve, të përhapur në çdo cep të globit.
Gjatë javës, humbje të mëdha kanë pësuar edhe dy miliarderë të tjerë të listës, Mark Zuckerberg, themelues i Facebook dhe Larry Page, themelues i Google. Të dy këta kanë humbur plot 4.6 miliardë dollarë gjatë javës.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.