Bezos “parakalon” Gates – Fiton $7 mld në një ditë, bëhet njeriu më i pasur në botë
Jeff Bezos, për herë të dytë në jetën e tij, u ngjit në vendin e parë të listës së njerëzve më të pasur të botës, duke fituar në vetëm një ditë 7 miliardë dollarë. Kjo ngjitje erdhi si pasojë e rritjes së ndjeshme të aksioneve të kompanisë së tij, Amazon, pas raportimit të fitmeve të tremujorit të fundit.
Kështu Bezos, aktualisht gëzon një pasuri prej rreth 90 miliardë dollarësh, pak më shumë se njeriu që ka mbajtur vendin e parë vazhdimisht gjatë dy dekadave të fundit, themeluesi i Microsoft, Bill Gates.
Edhe ky i fundit ka parë pasurinë e tij të ngjitet ndjeshëm gjatë sesionit të së Premtes, por pa mundur dot të mbajë vendin e parë. Vlerësohet se deri të Premten, pasuria e Bill Gates fiksohej në shifrën e 88.5 miliardë dollarëve.
Kjo është hera e dytë që Bezos zë vendin e parë të listës, por, herën e parë qëndroi në krye për më pak se 24 orë. Gjithsesi, Bezos është një ndër njerëzit që ka parë pasurinë e tij të rritet me mbi 60 miliardë dollarë në vetëm 5 vitet e fundit, si dhe njeriu që në dy dekada karrierë në këto nivele ka rritur pasurinë e tij me 500 herë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.