Biden: Administrata në Gatishmëri! – Premton ndihma për 6 shtetet e goditura nga mbi 30 tornado të fuqishme

Presidenti Joe Biden tha se administrata e tij do të qëndrojë në gatishmëri për të bërë “çfarëdo që do të nevojitet” pasi dhjetëra njerëz mbetën të vdekur nga një serë tornadosh të fuqishme dhe stuhi, që goditën 6 shtete të ndryshme në fundjavë.  “Qeveria federale do të bëjë gjithçka që mundet për të ndihmuar. Ju premtoj, çfarëdo që të nevojitet, qeveria do të gjejë një mënyrë për ta sjellë”- tha Biden në një konferencë në Delaware.

Arkansas, Illinois,  Kentucky, Missouri, Missisippi dhe Tennessee u goditën nga mbi 30 tornado. Biden tha se Agjencia Federale e Manaxhimit të Emergjencave ndodhet në terren në secilin nga 6 shtetet për të vlerësuar dëmet. Në Kentucky, të paktën 70 njerëz kanë vdekur dhe shifra mund të rritet në mbi 100. Guvernatori Andy Beshear tha se pret që tornado të ketë qenë më vdekjepruresi që godet shtetin ndonjëherë.   Mbi 180 trupa të gardës Kombëtare janë caktuar në zona në Kentuckin perëndimor, zonën më të goditur të shtetit.  Presidenti miratoi gjendjen e emergjencës për Kentuckin dhe shtoi se është gati për të miratuar kërkesat edhe për shtetet e tjera.

Në Illinois, të paktën 2 njerëz u konfirmuan të vdekur pas kolapsit të një magazine të Amazon në Edwardsville.  Shefi i Amazon, Andy Jassy, shkroi në Tëitter se e gjithë kompania është zemërthyer nga vdekjet.  “Kërkoj që komuniteti ynë në Edëardsville të dijë se ne jemi duke punuar me zyrtarët lokalë për t’i ndihmuar ata. Simpatitë më të thella janë me komunitetin e Amazon dhe të gjithë të ndikuarit”- tha ai.

Në Tennessee, moti i ashpër vrau të paktën 3 persona, sipas një zëdhënësi nga Agjencia e Manaxhimit të Emergjencave. New York Times raportoi se 2 persona mbetën të vdekur në Arkansas. Pamjet në media sociale treguan ndërtesa të shkatërruara dhe pemë të rëna. Sipas raporteve, mbi qindra mijëra klientë janë ende pa energji.  Një prej stuhive ka kaluar në 4 shtete, Arkansas, Missouri, Tennessee dhe Kentucky, në një rrugë prej 354 kilometra.  Kjo e kthen në tornado më të gjatë në historinë e SHBA, nëse do ketë qëndruar gjatë gjithë kohës në kontakt me tokën. Shërbimi Kombëtar i Motit pritet të ndërmarrë nëj sondazh për të përcaktuar nëse ishte një tornado i vetëm, i vazhdueshëm.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.