Biden apelon amerikanët për t’u vaksinuar – Apeli, pas miratimit të plotë të vaksinës Pfizer nga rregullatori amerikan
Presidenti amerikan Joe Biden u bëri thirrje amerikanëve të pavaksinuar kundër koronavirusit që të vaksinohen pasi Administrata e Ushqimit dhe Barnave i dha miratimin e plotë vaksinës Pfizer COVID-19.
“Nëse jeni një nga miliona amerikanë që thanë se nuk do të marrin dozën derisa vaksina të ketë miratimin e plotë dhe përfundimtar të FDA -së, kjo tani ka ndodhur. Momenti që keni pritur erdhi. Është koha që ju të shkoni të bëni vaksinën dhe ta bëni atë sot,” tha Biden.
Rregullatori amerikan i barnave i dha të hënën miratimin e plotë vaksinës Pfizer duke e bërë atë të parën që siguroi një vlefshmëri të tillë të Administratës së Ushqimit dhe Barnave.
Biden gjithashtu nxiti sektorin privat për të shtuar kërkesat për vaksinë për punonjësit në përputhje me ato që Biden u ka imponuar punonjësve federalë, shumë prej të cilëve tani duhet të zgjedhin midis vaksinimit dhe testimit të shpeshtë.
FDA, e cila dha autorizimin e përdorimit urgjent të vaksinës me dy doza në dhjetor, shkoi një hap më tej të hënën, bazuar në të dhënat e përditësuara nga prova klinike e kompanisë dhe e miratoi plotësisht atë për përdorim në njerëzit e moshës 16 vjeç e lart. Zyrtarët e shëndetit publik shpresojnë se veprimi do të bindë amerikanët e pavaksinuar se vaksina e Pfizer është e sigurt dhe efektive.
Rastet e COVID-19, të nxitura nga varianti shumë infektiv Delta, janë rritur në rajone të Shteteve të Bashkuara me nivele më të ulëta të vaksinimit.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.