Biden flet për “Omicron” dhe Rusinë – “Varianti i ri është i rrëzikshëm, nuk do zgjerojmë detyrimin e vaksinimit”
Presidenti amerikan, Joe Biden, deklaroi se administrata e tij nuk po konsideron detyrime shtesë për vaksinimin, pas zbulimit të varianteve të reja të Covid-19 në Afrikën e Jugut. Gjithsesi, administrata e Biden ndaloi udhëtimet nga ky vend dhe nga 7 vende të tjera. “Nuk dimë shumë për variantin e ri, përveçse që përbën një kërcënim të madh. Duhet të tregohemi të kujdesshëm”, deklaroi Biden.
Zbulimi i variantit të ri të koronavirusit, të quajtur Omicron, shkaktoi alarm global pasi shumë vende nxituan të pezullonin udhëtimet nga vendet e Afrikës Jugore, ndërsa tregjet e aksioneve në të dyja anët e Atlantikut pësuan rënien më të madhe në më shumë se 1 vit. Organizata Botërore e Shëndetësisë deklaroi se Omicron mund të përhapet më shpejt se çdo variant tjetër i koronavirusit dhe provat paraprake sugjerojnë se ekziston një rrezik i shtuar i riinfektimit.
Varianti Omicron ka një proteinë që është shumë më ndryshe nga koronavirusi origjinal, ku bazohen vaksinat, njoftoi Agjencia e Sigurisë Shëndetësore në Mbretërinë e Bashkuar, duke shtuar shqetësimet mbi efikasitetin e vaksinave aktuale. Gjithashtu, në lidhje me tensionin mes Rusisë dhe Ukrainës, gjatë fjalës së tij përpara gazetarëve në Massachussets, Biden tha se do të flasë me presidentët Putin dhe Zelenskiy për të zgjidhur situatën.
Shtetet e Bashkuara, NATO dhe zyrtarët e Ukrainës kanë ngritur alarmin gjatë javëve të fundit, duke thënë se lëvizje të pazakonta të trupave ruse janë vënë re pranë Ukrainës, duke sugjeruar se Moska mund të jetë e gatshme të nisë një sulm ndaj fqinjit të saj, akuza që Moska zyrtare i ka hedhur poshtë. Kreu i inteligjencës ushtarake ukrainase deklaroi se gjatë fundjavës Rusia kishte më shumë se 92 mijë trupa pranë kufirit me Ukrainën dhe po përgatitet për një sulm në fund të janarit ose në fillim të shkurtit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.