Biden: Plani ekonomik po funksionon. Brenda një viti realizuam arritjet më të mëdha në 50 vitet e fundit
Presidenti amerikan, Joe Biden, deklaroi se plani i tij ekonomik po funksionon, ndërsa në vitin e parë në krye të Shtëpisë së bardhë është realizuar arritja më e madhe në 50 vitet e fundit. Duke folur për gazetarët në Shtëpinë e Bardhë, Biden nënvizoi se progresi ekonomik në disa raste është penguar nga republikanët, sepse ata votuan kundër planit të rimëkëmbjes. “Unë nuk do t’i lejoj ata të pengojnë këtë rimëkëmbje. Dhe tani fokusi im është ta ruaj këtë rimëkëmbje të fortë dhe të qendrueshme, pavarësisht nga pengesat e republikanëve”, deklaroi Biden.
Komentet e presidentit erdhën menjëherë pas publikimit të të dhënave mbi punësimin për dhjetorin, që rezultuan më të dobëta se parashikimet e analistëve. Madje, pritet që rritja e punësimit të jetë modeste në muajt në vijim për shkak të rritjes së infektimeve me Covid-19. Gjithsesi, ka gjithmonë e më shumë shenja se njerëzit e papunë po rikthehen në tregun e punës, pas përfundimit të përfitimeve shtesë të papunësisë të financuara nga qeveria në fillim të vjeshtës, si pasojë e pandemisë.
Por, rikthimi në vendet e punës mund të ngadalësohet për shkak të përhapjes së shpejtë të omicron. Gjatë ditëve të fundit, Shtetet e Bashkuara të Amerikës kanë raportuar raste rekord me koronavirus, dhe shumica e tyre janë me variantin omicron, që mendohet se ka simptoma të lehta dhe të mesme.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.