Biden siguron integritetin e Ukrainës – “SHBA dhe aleatët do të përgjigjen me vendosmëri nëse Rusia sulmon”
Presidenti amerikan, Joe Biden, gjatë një bisede telefonike me presidentin e Ukrainës, Volodymyr Zelenskiy, deklaroi se Shtetet e Bashkuara dhe aleatët do të “përgjigjen me vendosmëri”, nëse Rusia pushton më tej Ukrainën, njoftoi Shtëpia e Bardhë në një deklaratë. Telefonata erdhi disa ditë pasi Biden zhvilloi bisedën e dytë brenda një muaji me presidentin e Rusisë, mes tensioneve në kufirin e Ukrainës me Rusinë, ku Moska ka zhvendosur më shumë se 100 mijë trupa.
“Presidenti Biden e bëri të qartë se Shtetet e Bashkuara dhe aleatët do të përgjigjen nëse Rusia pushton Ukrainën”, njoftoi zëdhënësja e Shtëpisë së Bardhë, Jen Psaki, në një deklaratë. Sipas Shtëpisë së Bardhë, Biden dhe Zelenskiy diskutuan përgatitjet për një seri takimesh diplomatike për të zgjidhur krizën. Ndërsa Zelenskiy njoftoi në Twitter se ata diskutuan për veprimet e përbashkëta për të ruajtur paqen në Europë dhe parandalimin e përshkallëzimit të situatës.
“Biseda e parë ndërkombëtare e vitit me presidentin Biden dëshmon natyrën e veçantë të marrëdhënieve tona”, shkruan Zelenskiy në Twitter. Përfaqësuesit nga Shtetet e Bashkuara dhe Rusia do të zhvillojnë bisedime më 9 dhe 10 janar, në Gjenevë që do të pasohen nga bisedimet e Këshillit Nato-Rusi dhe nga një takim i Organizatëas për Siguri dhe Bashkëpunim në Europë. Më herët, Biden i ka bërë thirrje Putinit se është e rëndësishme që rusët të ndërmarrin hapa drejt lehtësimit të krizës përpara këtyre takimeve.
Ndërsa, këshilltari për çështjet e jashtme të presidentit rus, deklaroi përpara gazetarëve se Putin e ka paralajmëruar Biden se vendosja e sanksioneve mund të çojë në prishjen e plotë të marrëdhënieve mes Rusisë dhe Perëndimit. Zyrtarët e Kremlinit kanë theksuar se duan garanci se çdo zgjerimi i ardhshëm i NATO-s duhet të përjashtojë Ukrainën dhe vendet e tjera ish-sovjetike. Rusët kanë kërkuar që aleanca ushtarake të heqë edhe armët ofensive nga vendet e rajonit. Në këtë pikë, Biden ka shprehur mbështetjen për masa diplomatike për të lehtësuar tensionet, duke riafirmuar angazhimet e Shteteve të Bashkuara për sovranitetin dhe integritetin territorial të Ukrainës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.