Bie barra e taksave, Heritage: Nga 27.2% në 24.9%, Shqipëria e treta në rajon

Raporti i lirisë ekonomike të Fondacionit Heritage për vitin 2019, veçse flet për një përmirësim të Shqipërisë me 13 pozicione në këtë renditje, hedh dritë edhe mbi aspekte të tjera të realitetit ekonomik dhe shoqëror të vendit tonë, sidomos krahasuar me fqinjët.

Një ndër arsyet e renditjes së mirë të Shqipërisë në këtë drejtim është edhe barra e taksave. Në vendin tonë, kjo normë, sipas Fondacionit Heritage fiksohet në 24.9% të totalit të të ardhurave të brendshme.

Një vit më parë kjo normë fiksohej në 27.2% thotë raporti, c`ka do të thotë se në të janë reflektuar edhe ndryshimet më të fundit fiskale. Por sa është kjo normë në vendet e tjera të rajonit?

Në 6 vendet e Ballkanit Perëndimor, vendi ynë renditet i treti, me diferencë të vogël me vendet e para dhe me diferencë të ndjeshme me vendet e fundit.

Kështu, të dhënat tregojnë se në vend të parë në rajon për normën që zë barra e taksave mbi totalin e të ardhurave të brendshme, qëndron Kosova, me një normë në 23.9%, dhe në rritje të ndjeshme në krahasim me vitin e kaluar.

Në vend të dytë është Maqedonia me vetëm 0.1 pikë përqindje më pak se ne, në 24.8%.

Pas Shqipërisë ndërkohë ndjek Mali i Zi me 36.1%, Bosnje Hercegovina me 37% dhe në fund fare të tabelës është Serbia me plot 38.3%.

Barra e taksave përfshin të gjitha taksat, si ato individuale ashtu edhe ato për biznesin. Barra e taksave është një ndër elementët më të rëndësishëm për të tërhequr investitorë, sidomos të huaj.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.