Bie besimi i konsumatorit amerikan – Në fillim të gushtit, shënoi nivelin më të ulët të dekadës
Besimi i konsumatorit amerikan ra ndjeshëm në fillim të gushtit në nivelin e tij më të ulët në një dekadë, në një shenjë shqetësuese për ekonominë. Rezultati i papritur i sondazhit mund të ndikojë në vendimarrjet e Rezervës Federale në muajt e ardhshëm. Banka qendrore po i afrohet një vendimi për nisjen e tërheqjes së stimulit të jashtëzakonshëm që vendosi për të mbrojtur ekonominë nga pandemia COVID-19.
Universiteti i Miçiganit tha se indeksi i tij paraprak i besimit të konsumatorit ra në 70.2 në gjysmën e parë të këtij muaji, kundrejt 81.2 në korrik. Ky ishte niveli më i ulët që nga viti 2011 dhe ka pasur vetëm dy rënie më të mëdha në indeks gjatë 50 viteve të fundit. Ato ishin në recesionin e viteve 2007-2009 dhe gjatë valës së parë të mbylljeve në Prill 2020 në fillim të pandemisë.
Indekset e tregut të aksioneve amerikane ranë menjëherë pas publikimit të raportit, ndërsa çmimi i arit fitoi terren. Bonot e thesarit të SHBA prekën nivelet më të ulëta të seancës. Ekonomia pritet të rritet këtë vit me ritmin e saj më të shpejtë në katër dekada pasi ra në një recesion të shkurtër në vitin 2020 të shkaktuar nga pandemia e koronavirusit. Por rimëkëmbja po tregon disa tregues të ftohjes.
Rastet e COVID-19 janë dyfishuar në dy javët e fundit për të arritur një kulm gjashtëmujor pasi varianti Delta po përhapet me shpejtësi në të gjithë vendin. Mungesat e fuqisë punëtore në të gjithë sektorin e shërbimeve vazhdon, ndërsa ndërprerjet e zinxhirit të furnizimit kanë vazhduar.
Treguesi i sondazhit për kushtet aktuale ekonomike gjithashtu ra në 77.9, nga 84.5 në korrik, ndërsa treguesi i pritjeve të konsumatorëve u ul në 65.2, nga 79 në korrik. Sondazhi gjithashtu tregoi se konsumatorët po rritnin pritshmëritë e tyre për inflacionin afatmesëm, një masë tjetër që banka qendrore po monitoron nga afër për të siguruar që pritjet për inflacionin të mbeten të ankoruara.
Pritshmëria inflacioniste njëvjeçare e sondazhit u ul në 4.6%, nga 4.7%, por perspektiva e saj pesëvjeçare u rrit në 3%, nga 2.8% në korrik. Rritjet e çmimeve të konsumit u ngadalësuan në korrik, tha Departamenti i Punës, por inflacioni në përgjithësi mbeti në një nivel historik të lartë mes ndërprerjeve të vazhdueshme të zinxhirit të furnizimit dhe kërkesës më të fortë për shërbime të lidhura me udhëtimet.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.