Bie fluksi i materialeve mjedisore – Rreth 25% me pak lëndë e nxjerrë për vitin 2017
Nxjerrja e lëndës së parë nga burimet e brendshme natyrore, e cila përfaqëson sasinë totale të materialeve që përdoren direkt në ekonomi, ka pësuar rënie.
Sipas Institutit të Statistikave për vitin 2017 lënda e parë e nxjerrë është rreth 21.4 milionë ton, duke shënuar një rënie me 24,77 % krahasuar me vitin 2016. Sipas të dhënave të publikuara nga INSTAT, struktura e burimeve të brendshme natyrore, tregon që produktet “minerale jo metalike” zënë rreth 49,46 %, “biomasa” 38,12 %, “mineralet metalike” 6,33 % dhe “materialet e energjisë fosile” me 6,09 %. Po ashtu vihet re se përgjatë vitit 2017 ka pasur një rritje të importit të materialeve mjedisore, kryesisht në produktet e “biomasës”.
Për vitin 2017 u importuan rreth 4.2 milionë ton, e cila krahasuar me vitin 2016 është 5,23 % më e lartë. Ndërsa eksportet arritën një vlerë prej rreth 4 milionë ton, duke pësuar ulje me 0,28 % krahasuar me një vit më parë ndikim më të madh në uljen e eksporteve në total e kanë dhenë “materialet fosile të energjisë” me 28,53 %.
Rritje të eksporteve kanë sjellë “mineralet jo metalike” me 15,2 % dhe “biomasa”me rreth 11,44 %. Bilanci fizik tregtar i cili tregon diferencën midis importeve dhe eksporteve për të gjithë kategoritë e materialeve mjedisore arriti vlerën e rreth 330 mijë ton për vitin 2017, duke pësuar rritje me 223,9 mijë ton krahasuar me vitin 2016 ku sasia e importuar e materialeve mjedisore ishte më e vogël se sasia e eksportuar.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.