Bie huadhënia te bizneset – Eurozona në ngërç. Të gjithë vendet e mëdha tregojnë rënie

Huadhënia bankare tek kompanitë e Eurozonës regjistroi rënie në muajin e kaluar në të gjithë shtetet e mëdha,  sipas të dhënave të Bankës qendrore Europiane.

Në përpjekje për të ndaluar rënien ekonomike që vjen kryesisht nga tkurrja e sektorit gjigant industrial të Gjermanisë, Banka Qendrore Europiane miratoi stimuj të rinj monetarë. Në mënyrë që stimujt të jenë të efektshëm, institucioni pret që bankat të ofrojnë kredi drejt ekonomisë reale.

Megjithatë, të dhënat e reja tregojnë se ngadalësimi po përhapet edhe në vende dhe sektorë të tjerë. Huadhënia tek korporatat në 19 vendet e zonës euro u ngadalësua në 3.7% në Shtator, nga 4.3% në Gusht.  Franca, Gjermania, Italia dhe Spanja treguan rënie.

Fluksi mujor i kreditit tek korporatat tregoi një rënie me 8.1 miliardë euro, që është rënia më e madhe që prej Janarit 2015 dhe treguesi i parë negativ që prej fillimit të vitit. Vetëm në Francë,  norma e rritjes mujore të kreditit ra në 6.7% nga 8.3%,  ndërkohë që flukset mujore ishin negative në 11.7 miliardë euro, ç’ka tregon se bankat tkurrin kreditin drejt ekonomisë.

Huaja te ekonomitë familjare mbeti e pandryshuar në 3.4%, për të 3-in muaj radhazi. Agregati monetar M3, që është tregues i ofertës së parasë, u ngadalësua në 5.5% në Shtator, poshtë pritshmërive.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.