Bie inflacioni në Eurozonë – Tre muaj radhazi në rënie. Treguesi bazë rritet lehtë
Inflacioni në Eurozonë ra për të tretin muaj radhazi gjatë Janarit, ndërkohë që çmimet e energjisë u tërhoqën. Treguesi bazë u rrit lehtë, duke mbështetur paksa perspektivën e Bankës Qendrore Europiane.
Agjencia e Statistikave e Bashkimit Europian vlerësoi se indeksi i çmimeve të konsumit në 19 vendet e valutës së përbashkët, u rrit me 1.4% në Janar, në ngadalësim nga 1.6% që u raportua në Dhjetor.
Ngadalësimi pritej gjerësisht nga ekonomistët. Rënia e fundit e çon nivelin e çmimeve shumë poshtë objektivit të Bankës Qendrore Europiane.
Megjithatë, inflacioni bazë, që ndiqet nga institucioni në Frankfurt për të ndihmuar në vendimmarrjen politike, që përjashton çmimet e luhatura të energjisë dhe ushqimit, u rrit në 1.2% në Janar, nga 1.1% që ishte norma e Dhjetorit.
Një tregues tjetër, që heq edhe kontributin e alkoolit dhe duhanit, u rrit gjithashtu në 1.1%.
Inflacioni u ngadalësua kryesisht prej çmimeve të energjisë, që regjistruan një rritje me vetëm 2.6% në Janar me bazë vjetore, krahasuar me 5.4% në Dhjetor.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.