Bie konsumi – Më pak shpenzime për ushqim, më shumë për shëndetin

Megjithëse ekonomia është në përmirësim dhe papunësia në rënie, familjet shqiptare po konsumojnë më pak. Anketa e Buxhetit të Familjeve, e publikuar të hënën nga Instituti i Statistikave, tregoi se shpenzimet e familjeve shqiptare për konsum u rritën me vetëm 0.4% vitin e kaluar. Por, në terma realë, duke indeksuar me normën vjetore të inflacionit prej 2%, konsumi i familjeve rezultoi në rënie.

Sipas Instat, një familje shqiptare shpenzon mesatarisht 73,400 lekë për konsum. Po të kemi parasysh se përbërja mesatare për familje është 3.7 persona, konsumi mujor për frymë është më pak se 20 mijë lekë. Ushqimi ngelet zëri që dominon strukturën e shpenzimeve të familjeve shqiptare, me 44% të shpenzimeve totale.

Por, vitin e kaluar, shpenzimet për konsum ranë me 2.2%. Rënia drastike vitin e kaluar pësuan edhe shpenzimet për veshje dhe për arsimim, me më shumë se 10% më pak krahasuar me vitin 2016. Ndërkohë, grupet që patën rritjen më të lartë të shpenzimeve ishin transporti dhe shëndeti, të dy në kufijtë e 15%.

Ndërkohë që rritja e shpenzimeve për transport mund të lidhet me lëvizjen e çmimeve të karburanteve, domethënëse është rritja e shpenzimeve për shëndetin. Ndërkohë që qeveria shqiptare prej pesë vjetësh ka premtuar shëndetësi falas, në fakt, duket se shqiptarët po paguajnë më shumë nga xhepi për shëndetin.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.