Bie ndjeshëm besimi konsumator në SHBA – Niveli më i ulët në 6 vite, rriten shqetësimet për ekonominë
Besimi konsumator në Shtetet e Bashkuara të Amerikës ra pranë nivelit më të ulët në më shumë se 6 vite gjatë gushtit, si pasojë e shqetësimeve të familjarëve për të ardhurat dhe tregun e punës. Gushti është muaji i dytë me radhë në rënie për indikatorin që mat besimin konsumator, duke hedhur hije të tjera mbi ekonominë e vendit, si dhe duke lënë mënjanë rritjen rekord të shitjeve të shtëpive, pranë nivelit më të lartë të 13 viteve të fundit.
Tregu imobiliar për shtëpitë vijon të tregojë shenja të qarta imuniteti ndaj pandemisë. Kështu, të dhënat e fundit tregojnë se, indeksi i besimit konsumator ra pranë nivelit të 84.8 pikëve këtë muaj, që është edhe niveli më i ulët që prej majit të vitit 2014, nga 91.7 pikë që ishte në muajin korrik. Leximi është gjithashtu shumë larg pritshmërive të tregjeve dhe analistëve. Konsumatorët që presin një rritje të të ardhurave janë vetëm 12.7% e totalit, nga 14.8% që ishin në muajin korrik. Ekonomia më e madhe e botës regjistori tkurrjen më të madhe në 73 vitet e fundit gjatë tremujorit të dytë të vitit.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.