Bie numri i bizneseve në kryeqytet. 522 më pak se në 2016 – Shtohen sipërmarrësit me veprimtari dytësore
Në fund të vitit që lamë pas, numri i bizneseve në kryeqytet u ul me 522 subjekte, në krahasim me shifrat e raportura në fund të 2016-ës.
Ndikimin kryesor në këtë rënie e ka ulja e numrit të subjekte aktive kryesore të klasifikuara si biznes i madh. Subjektet e regjistruara në këtë kategori, sipas të dhënave nga Drejtoria e Përgjithshme e Taksave dhe Tarifave Vendore, janë ulur në rreth 7887 biznese, nga 9174 në fund të vitit 2016.
Megjithatë, numri i ulët i kërkesave mbylljen e subjekteve biznes i madh, çregjistrimin apo kalimin në status pasiv, nënkupton se një pjesë e madhe tyre mund të kenë ndryshuar përgjegjësi tatimore. Në fakt, falë një trendi rritës përgjatë vitit, numri i bizneseve kryesore të vogla është rritur ndjeshëm me 771 subjekte.
Gjithsesi, në kategorinë e subjekteve aktive kryesore, për shkak të rënies së subjekteve VIP, pra tatimpaguesve të mëdhenj, dhe subjekteve të tjera, ka një rënie të numrit total të subjekteve aktive me rreth 983 subjekte.
Situata paraqitet tërësisht ndryshe në kategorinë e subjekteve sekondare, të cilat janë rritur me 461 njësi. Këtu klasifikohen aktivitetet dytësore të një sipërmarrësi, degët e tjera të një biznesi që ka zgjeruar aktivitetin, etj.
Rritje ka veçanërisht në drejtim të bizneseve të vogla sekondare dhe të bizneseve VIP, të cilat kanë zgjeruar rrjetin e tyre. Në fund të 2017, ka 70 biznese dytësore VIP më shumë, si edhe 395 biznese të vogla dytësore më shumë.
Një ndryshim i tillë në panoramën e sipërmarrjes në kryeqytet, ku bizneset kryesore janë tkurrur dhe ato dytësore janë shtuar, do të thotë se më shumë biznese janë përqendruar në duart e një sipërmarrësi apo grupi sipërmarrësish, ndërsa për pjesën tjetër, viti 2017 ka rezultuar më i vështirë.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.