Bie numri i mashtrimeve/ 820 procedime në total, ulet edhe numri i të pandehurve e të të dënuarve
Vepra penale e mashtrimit ka shënuar ulje gjatë vitit të shkuar, ndërkohë që e njëjta gjë ka ndodhur lidhur me numrin e personave të proceduar për krimet e kësaj natyre. Scan ka zbardhur të dhënat zyrtare të Prokurorisë së Përgjithshme, nga të cilat rezulton se gjatë vitit të shkuar janë regjistruar në total 820 procedime penale për këtë vepër, nga 987 një vit më parë.
Nga të dhënat statistikore rezulton se në vitin 2018 numri i procedimeve të regjistruara për veprat penale të mashtrimit ka një ulje prej 16,92 % krahasuar me vitin 2017 e ndërkaq kemi ulje prej 49,44 % të procedimeve të dërguara në gjykatë në krahasim me vitin 2017. Në lidhje me të pandehurit, për këtë grup veprash penale, vihet re ulje e numrit të të pandehurve të regjistruar përkundrejt këtij totali në vitin 2017 prej 46,18 %, një ulje e numrit të të pandehurve të cilët janë dërguar në gjykatë prej 34,61 % dhe ulje e numrit të të pandehurve të dënuar nga gjykata me 58,66 % përkundrejt vitit 2017.
Rezulton se 79,31 % e të pandehurve janë meshkuj (ndër të cilat rezulton 1 i mitur) dhe 20,69 % e të pandehurve janë femra.Për sa i përket arsimit të të pandehurve rezulton se 33,83 % e të pandehurve janë me arsim deri 9 vjeçar, 50,75 % me arsim të mesëm dhe 15,42 % me arsim të lartë.
Në këtë grup veprash janë marrë të pandehur 13 shtetas të huaj.Për sa i përket gjendjes shoqërore nga të dhënat statistikore vihet re se 1,89 % e të pandehurve rezultojnë të punësuar në sektorin shtetëror, në sektorin privat rezultojnë 34,43 % e të pandehurve dhe 63,68 % janë të papunë. Rezulton se 66,82 % e të pandehurve kanë vendbanimin në qytet, ndërsa 33,18 % prej tyre në fshat.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.