Bie papunësia në BE – Progres në 26 vende, norma bie në 8%, rekord prej 2009-ës

Norma e papunësisë në Eurozonë ka rënë në 9.5% gjatë muajit Shkurt të këtij viti, nga 9.6% që ishte në muajin e parë të vitit, tregon Eurostat.

Në terma vjetorë ndërkohë, rënia është e theksuar, pasi gjatë së njëjtës periudhë të një viti më parë, papunësia në zonën e monedhës së përbashkët europiane fiksohej në 10.3%.

Edhe në Bashkimin Europian, në të 28 vendet, norma e papunësisë regjistrohet në rënie, në 8%, nga 8.1% që ishte në muajin Janar, dhe nga 8.9% që ishte në shkurtin e vitit 2016.

Kjo është norma më e ulët e papunësisë në Europë që prej vitit 2009, duke konfirmuar edhe njëherë momentin e mirë që po kalon ekonomia e kontinentit.

Mes vendeve anëtare, normën më të ulët të papunësisë e regjistron Republika Ceke, me 3.4%, e ndjekur nga Gjermania. Në ekonominë më të madhe të Europës, norma e papunësisë fiksohet në 3.9%.

Greqia me 23.1 dhe Spanja me 18% kanë normën më të lartë të papunësisë në Bashkimin Europian dhe eurozonë. Ndër 28 vende, 26 prej tyre kanë regjistruar një përmirësim në tregun e punës.

Dy prej tyre ndërkohë, Danimarka dhe Lituania kanë regjistruar një rritje të papunësisë. Progresin më të madh ndërkaq, në terma vjetorë, e shënon Kroacia, ku norma në vetëm një vit ka rënë nga 14.4% në 11.6%, si dhe Spanja, nga 20.5% në 18%.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.