Bie tregu i punës në SHBA – Sinjali i radhës i ngadalësimit të ekonomisë më të madhe në botë
Tregu i punës në Shtetet e Bashkuara të Amerikës është ngadalësuar ndjeshëm gjatë Shkurtit, me ekonominë që arriti të krijojë vetëm 20 mijë vende të reja pune, thonë të dhënat më të fundit nga departamenti i punës në vend.
Ky është një sinjal i qartë i një ngadalësimi ekonomik gjatë tremujorit të parë të vitit. Edhe rritja e pagave rezulton të jetë më e ulëta që prej Shtatorit të vitit 2017.
Të dhënat për tregun e punës në vend janë shuplaka e radhës për Presidentin Donald Trump i cili ka pësuar disfata të njëpasnjëshme gjatë javëve të fundit.
Objektivi i Shtëpisë së Bardhë për një rritje në 3% ka dështuar, deficiti tregtar në mallra është pranë rekordit historik, pavarësisht politikës së tij `Amerika e Para`, ndërkohë që dështoi të arrinte edhe një marrëveshje bërthamore me Korenë e Veriut.
Gjithsesi, ekspertët argumentojnë se, ngadalësimi i tregut të punës mund të jetë edhe për faktin se ky treg është pranë kapacitetit të plotë, me papunësinë në rekord minimal historik, nën 4%.
Projeksionet për rritjen ekonomike gjatë tremujorit të parë të vitit fiksohen pranë 1% në terma vjetorë. Tregjet amerikanë ranë pas raportimit të të dhënave të fundit për tregun e punës.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.