Bien lehtë borxhet ndaj OSHEE-së – Faturat e papaguara nga klientët arrijnë në 76.93 miliardë lekë, ujësjellësit thellojnë debinë

Borxhi që konsumatorët kanë ndaj Operatorit të Shpërndarjes së Energjisë Elektrike për fatura të papaguara ka shënuar rënie gjatë 9-mujorit të këtij viti, ndryshe nga 8-mujori i cili kishte një tendencë në rritje. Sipas të dhënave zyrtare, në total shuma e fatuarave të palikujduara arriti në 76,93 mld lekë, nga 77.47 mld lekë, që ishte deri në fund të muajit gusht. Niveli I detyrimeve të pashlyera që klientëte i kanë OSHEE-së është një nga më të lartët, që prej vitit 2013, ku niveli i borxhit ishte 71.37 mld lekë. Sa i takon 9-mujorit të këtij viti, rënie e borxhit është shënuar thuajse për të gjitha kategoritë, duke përfshirë konsumatorët familjarë, biznese, institucionet buxhetore.

Ndërkohë që, kategoria e vetme që ka shënuar përkeqësim janë institucionet jobuxhetore, ku përfshihen ujësjellësit, që vijojnë të thellojnë borxhin ndaj kompanisë publike të energjisë. Kjo kategori,, ku edhe klubet sportive kanë një debi të palikujduar ndaj OSHEE-së, në masën e 15,47 mld lekëve, nga 15.25 mld lekë që ishte kjo vlerë për 8-mujorin. Ndërkaq, institucionet buxhetore kanë një përmirësim të lehtë duke arritur në 4.52 mld fatura të papaguara, nga 4.6 mld lekë që ishte në periudhën janar-gusht.

Sa i takon konsumatorëve familjarë, që janë edhe debitorët më të mëdhenj për 9-mujorin arritën një borxh total prej 45.41 mld lekësh, nga 45.78 mld lekë që ishte në periudhën 8-mujore. Ndërkaq, edhe bizneset regjistrojnë një borxh prej 11.51 mld lekësh për fatuar energjie të palikujduara, nga 11.81 mld lekë që ishte kjo vlerë për periduhën janar-gusht. Në total, arkëtimet nga Operatorit i Shpëndarjes së Energjisë Elektrike rezultojnë në 95.3% e faturave të emetuara.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.