Bien me 80% kërkesat për azil – Shqipëria, vendi me rënien më të madhe të kërkesave në T2
Të dhënat më të fundit nga zyra europiane e statistikave tregojnë se, pandemia e ka frenuar ndjeshëm fluksin e azilantëve shqiptarë drejt Europës, por nuk e ka ndalur dot atë. Gjatë periudhës prill-qershor, të dhënat zyrtare tregojnë se, Franca vijon të mbetet në vend të parë si preferencë e shqiptarëve azilkërkues, e ndjekur nga Gjermania dhe në vend të tretë Italia. Franca mban thuajse gjysmën e kërkesave, më saktë 44% të totalit, me plot 205 aplikime në tremujorin e dytë.
Në tremujorët paraardhës, shifrat kanë qenë disa herë më të larta e madje shpeshherë duke e kaluar pragun e 1 mijë aplikimive në një tremujor. Gjermania numëron vetëm 140 aplikime, ndërsa Italia 55 të tilla në total në tre muaj. Këto tre shtete zënë 86% të totalit, ndërkohë që gjatë të gjithë tremujorit të dytë të vitit, shqiptarët azilkërkues për herë të parë numërohen në rreth 465, nga rreth 2,320 të tremujorit të parë. Rënia në terma tremujorësh fiksohet në masën 80%, dhe në terma vjetorë në 89%. Shqipwria figuron si vendi i origjinës me rënien më të madhe të kërkesave pas shpërthimit të pandemisë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.