Bilancet e kompanive, të shtunën afati i fundit – QKB paralajmëron bizneset: Depozitoni pasqyrat e auditimet, penalitetet 15 mijë lekë
Përmes një njoftimi në faqen e vet zyrtare, Qendra Kombëtare e Biznesit u kujton të gjitha kompanive të depozitojnë brenda 31 korrikut bilancet vjetore, raportet e aktivitetit si dhe auditimet për të shmangur penalitetet. Qendra paralajmëron se, bazuar në nenin 43, të Ligjit nr. 9723, datë 03.05.2007, “Për regjistrimin e biznesit”, subjektet duhet të regjistrojnë dhe depozitojnë pasqyrat financiare vjetore, raportin e ecurisë së veprimtarisë dhe raportin e auditimit, të mbajtur sipas kërkesave ligjore, në rastet kur mbajtja e këtyre dokumenteve është e detyrueshme, jo më vonë se 7 muaj nga data e mbylljes së çdo viti financiar, në të kundërt aplikohet sanksion administrativ gjobë, prej 15000 lekë.
Afati përfundimtar, për dorëzimin e këtyre dokumentave është data 31 korrik 2021. Më tej QKB shpjegon se dorëzimi i pasqyrave financiare do të kryhet në formatin Excel, nëpërmjet portalit qeveritar e-Albania. Ndërkaq, për informacione të mëtejshme lidhur me mënyrën e dorëzimit dhe përdorimit të formatit të ri, Qendra Kombëtare e Biznesit këshillon konsultimin me Manualin e Përdorimit për aplikimin për depozitimin e pasqyrave financiare dhe raporteve.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.