Bilanci 2-javor i “rrugëve” – Akset që u pastruan nga aktivitete të paligjshme, ja ku do vijohet
Pas nisjes së aksionit për pastrimin e akseve kombëtare nga objektet e jashtëligjshme, Autoriteti Rrugor Shqiptar dhe Inspektorati Kombëtar për Mbrojtjen e Territorit kanë publikuar rezultatet e javës së dytë të ndërhyrjes në terren.
Sipas të dhënave, rrethrrotullimi Rrogozhinë-Plepa në të dyja drejtimet është pastruar në masën 90%. Në këtë aks janë hequr 85 tabela dhe është bërë spostimi i materialeve të vendosura në anën e karrexhatës.
Gjithashtu, në bashkëpunim me policinë janë hequr tezgat e tregtimit në rrethrrotullimin e Rrogozhinës dhe dy kioska të lëvizshme. Ndërkohë që, aksi Vorë-Fushë Krujë në të dyja drejtimet është pastruar duke hequr 60 tabela.
Në këtë segment, është bërë spostimi i objekteve të ngurta të tregtueshme të pozicionuara në anën e karrexhatës si goma dhe materiale të tjera. Ndërkaq, Fundjavën që kaloi puna u përqendrua në aksin Elbasan-Rrogozhinë dhe është arritur të bëhet pastrimi deri në hyrje të Peqinit, duke hequr 67 tabela, janë spostuar gomat që ishin të vendosura në anën e karrexhatës dhe janë prishur 6 tezga buzë rrugës.
Po gjatë kësaj jave u ndërhy edhe në nyjen e Milotit ku u prishën 26 kioska të tregut ambulant ashtu sikurse një objekt 1 katësh i ndërtuar në kundërshtim me përcaktimet ligjore.
Ndërsa, në mbikalimin e Dajlanit është ndërhyrë duke zhvendosur të 5 tabelat e mëdha të reklamimit. Ndërkaq, referuar të dhënave të këtyre institucioneve, në javën e parë të aksionit, në aksin rrugor Tiranë-Shkozet janë hequr 70 tabela dhe reklama informuese.
Në vijim të ndërhyrjeve, gjatë kësaj jave ARRSH dhe IKMT do të ndërhyjnë në dy akse të tjera, në atë Rrogozhinë-Fier dhe Fushë Krujë-Lezhë.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.