Bilanci i energjisë për 9-mujorin – Gati 2-fish më shumë energji e prodhuar se vjet. Rriten humbjet në rrjetin e shpërndarjes

7.37 mln mwh energji u prodhuan gjatë 9-mujorit të këtij viti nga të gjithë burimet gjeneruese në vend, gati 2-fish më shumë në raport me një vit më parë, ku për të njëjtën periudhë u gjenerua rreth 4 mln mwh energji. Sipas të dhënave nga Enti Rregullator i Energjisë, prodhimi u dominua nga hidrocentralet publike të Kaskadës së Drinit me rreth 60% të energjisë totale.

Ndërkohë që, pjesa tjetër është prodhuar nga hidrocentralet private dhe koncesionare. Paralelisht ka vijuar edhe prodhimi i energjisë nga centralet fotovoltaike, ndonëse sasia e gjeneruar është tejet e ulët në raport me energjinë e prodhuar nga burimet hidrike. Në total këto impiante prodhuan 34 306 Mwh energji, duke shënuar rritje në raport me të njëjtën periudhë të një viti më parë, ku prej këtyre impianteve u prodhua 26 321 mwh energji.

Ndërkaq, konsumi total i energjisë për 9-mujorin arriti në rreth 6,28 mln mwh, çka tregon se për këtë periudhë energjia e prodhuar është më e madhe se ajo e konsumuar. Ndërkaq, niveli i humbjeve në rrjetin e shpërndarjes për 9-mujorin u regjistrua në 20.94%, duke shënuar përkeqësim në raport me të njëjtën periudhë të vitit të kaluar, ku humbjet përllogariteshin në 19.4%.

Edhe niveli i arkëtimeve ka një tendencë të lehtë në rënie gjatë 9-mujorit, në raport me periudhën janar-shtator të vitit të kaluar. Për periudhën janar-shtator të këtij viti, u paguan 95.3% e faturave të gjeneruara nga 95.65% që ishte vitin e kaluar.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.