“Bilanci” i paketës fiskale 2019- Cilat janë ndryshimet që shtojnë e që heqin të ardhura nga arka e shtetit!
Paketa e re fiskale që do të aplikohet nga 1 janari i vitit 2910 parashikon një serë ndryshime të rëndësishme, një pjesë e të cilave janë me efekt negativ në buxhetin e shtetit, e një pjesë tjetër me efekt pozitiv në rritjen e të ardhurave.
Impaktet negative në buxhet
Referuar nismave ligjore të depozituara në Kuvend, vetëm dy ndryshime kanë ndikim negativ në të ardhurat e buxhetit të shtetit. Nisma për uljen e tatimit për pagat e larta parashikohet të ketë një kosto -319 milionë lekë ndërsa nisma për uljen e Tvsh për reklamat dhe autobuzët elektrikë ka ndikim minus 300 milion lekë për arkën e shtetit.
Ndërkohë, ndikim më të madh pozitiv parashikohet ta ketë reduktimi i normës së tatimit mbi dividentin nga 15 % në 8 %. Ndikimi negativ parashikohet në nivelin 1 miliard lekë në vit.
Impaktet pozitive në buxhet
E lëvizja që parashikohet të ketë ndikimin më negativ në buxhet në aspektin e të ardhurave, është edhe lëvizja që pritet t’i sigurojë arkës së shtetit ndikimin më pozitiv! Pavarësisht se lëvizja për uljen e tatimit mbi dividentin sjell si faturë direkte -1 miliard lekë, pritshmëritë janë që efekti pozitiv të jepet përmes rritjes së numrit të kompanive që shpërndajnë dividend si rezultat i uljes së shkallës së tatimit, pak e shumë sikurse ndodhi me taksën e sheshtë vite më parë. E nga rritja e numrit të kompanive që shpërndajnë dividend, arka e shtetit parashikohet të përfitojë një rritje të të ardhurave buxhetore me 2 miliard lekë.
Ndryshime të tjera të paketës fiskale që sjellin të ardhura shtesë për buxhetin janë ato në në ligjin për taksat kombëtare. Ndryshimet parashikojnë rishikim të skemës së taksimit të ambalazheve të plastikës dhe të qelqit si dhe propozon rritjen e rentës për eksportin e mineralit të kromit të papërpunuar. Efekti në arkën e shtetit është plus 500 milion lekë.
Ndërsa ndryshimet në ligjin për akcizat, parashikohet të kenë si efekt për arkën e shtetit +144 milionë lekë.
Nismat ligjore të depozituara në Kuvend do të diskutohen në komisione për t’u votuar me ndryshimet përkatëse që mund t’u bëhen.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.