Bilanci i zjarrit në Portugali, 52 viktima dhe 54 të plagosur

Zjarri që përfshiu Portugalinë qendrore ka vrarë të paktën 62 persona, në atë çfarë konsiderohen flakët më vdekjeprurëse të ndodhura ndonjëherë në vend.

“Përmasat e këtij zjarri janë të tilla sa që nuk kemi kujtesë të ndonjë tragjedie njerëzore të tillë”, u shpreh kryeministri Antonio Costa. Ai shpalli ditët nga e Diela deri të Martën si ditë zie kombëtare për viktimat e flakëve.

Qeveria thotë se janë 360 ushtarë dhe 700 zjarrfikës të cilët po luftojnë për të shuar zjarrin e nisur të Shtunën.

Të dhënat e fundit tregojnë se shumica e njerëzve humbën jetën në makinat e tyre teksa përpiqeshin t’u largoheshin zjarrit. Të paktën 30 njerëz vdiqën brenda në makina, ndërsa 17 të tjerë pranë makinave të tyre ose pranë rrugës. 11 njerëz humbën jetën në pyll, ndërsa dy njerëz vdiqën në një aksident me makinë të lidhur me zjarrin.

Deri më tani nuk ka viktima të vrarë nga zjarri brenda shtëpive të tyre, ndërsa numri i të plagosurve ka arritur në 54 njerëz, nga të cilët 5 janë të plagosur rëndë.

Temperaturat në zonë kanë qenë rreth 40 gradë celcius ditët e fundit, ndërsa Portugalia vuan shpesh nga zjarret gjatë muajve më të nxehtë dhe më të thatë të verës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.