Bilanci tragjik i tërmetit/ Të paktën 40 viktima! MSH: ”Vijon gatishmëria, 750 të lënduar u trajtuan në spitale”
Të paktën 40 vetë kanë humbur jetën nga tërmeti i fuqishëm që goditi vendin mëngjesin e 26 nëntorit. Bilanci tragjik është thelluar edhe në drejtim të të plagosurve, ku sipas Ministrisë së Shëndetësisë ka shkuar në 750 numri i të lënduarve që kanë marrë trajtim në spitale, nga të cilët 660 vetëm në spitalin e Traumës dhe Durrësit. Pjesa më e madhe e tyre tashmë kanë lënë institucionet shëndetësore, ndërkohë që të dhënat e fundit flasin për 65 të shtruar, gjendja e të cilëve paraqitet e stabilizuar, përveç 3 personave që paraqiten në gjendje më të rënduar.
Po sipas të dhënave zyrtare, përpos qytetarëve që po marrin trajtim në spitale, janë 572 vizita mjekësore të kryera për banorët e prekur nga tërmeti që marrin trajtim në qendrat shëndetësore 24/7 të hapura pranë zonave të prekura. Ndërsa 145 persona kanë marrë shërbimin mjekësor pranë kampeve të emergjencës në Tiranë dhe Durrës, ndërkohë që me ekipet e ngritura në terren është siguruar pajisja me medikamente për të sëmurët kronikë. Urgjenca kombëtare ka përballuar 3745 thirrje për ndihmë që nga momenti i rënies së tërmetit dhe ka realizuar 937 misione me autoambulancë. Ndërkaq, Ministria e Shëndetësisë rikonfirmon se të gjitha spitalet dhe qendrat shëndetësore pranë zonave të prekura nga tërmeti janë në gatishmëri të përforcuar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.