Bilanci tregtar në Eurozonë – Fuqizohet në muajin Maj, rritet ndjeshëm tregtia me Rusinë

Tregtia në Eurozonë është fuqizuar në muajin Maj, me eksportet dhe importet e mallrave me pjesën tjetër të botës që u rritën ndjeshëm. Bashkimi Europian, pati gjithashtu një rritje të tregtisë me të gjithë partnerët kryesorë, ndërkohë që shkëmbimet me Rusinë u rritën pavarësisht sanksioneve ekonomike.

Eurostat deklaroi se eksportet e Eurozonës me pjesën tjetër të botës u rritën me 12.9%  në Maj me bazë vjetore, në një vlerë prej 189.6 miliardë euro.  Importet u rritën gjithashtu, me një normë prej 16.4%, në një volum total prej 168.1 miliardë euro, tregojnë të dhënat e papërshtatura me faktorët sezonale.

Të dy rezultatet sollën rekordin e dytë më të madh të regjistruar ndonjëherë në Eurozonë, pas majës së arritur në muajin Mars, ku eksportet arritën sipër 200 miliardë euro, ndërsa importet në 176 miliardë euro.   Rritja më e shpejtë e importeve në përqindje, reduktoi lehtë suficitin tregtar të bllokut, që rezultoi në 21.4 miliardë euro, në rënie me 23.4 miliardë që ishte një vit më parë.

Bashkimi Europian, regjistroi gjithashtu një rritje me 15.9%të eksporteve dhe një rritje me 17.2% të importeve, raporton Eurostat. Blloku i 28-vendeve ka rritur tregtinë me të gjithë partnerët kryesorë në gjysmën e parë të vitit, me eksportet drejt SHBA që u rritën me 6.6%, ndërsa me Kinën në 20.3%.  Rusia i zuri vendi Zvicrës, si burimi i tretë më i madh i importeve për Bashkimin Europian.

Pavarësisht sanksioneve ekonomike, eksportet e BE drejt Rusisë u rritë me 24.6% nga Janari në Maj, ndërsa importet, të përbëra kryesisht nga nafta dhe gazi, u rritën me 37.6%.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.