Bitcoin bie poshtë $13,000 – Performanca më e keqe që prej 2013, monedha të tjera tregojnë rritje
Bitcoin ra poshtë 13,000 dollarëve ditën e Premte ndërkohë që humbi më shumë se 1/3-ën e vlerës në vetëm 5 ditë. Valuta dixhitale ka treguar performancën më të keqe që prej vitit 2013, pas majës së arritur ditën e Djelë prej rreth 20,000 dollarë.
Valuta më popullore dixhitale ka patur një rritje spektakolare që prej nisjes së këtij viti, duke prekur 19,666 dollarë në bursën në Luksemburg, Bitstamp, dhe 20,000 dollarë në të tjera, nga më pak se 1,000 dollarë që ishte në muajin Janar.
Megjithatë, Bitcoin ka rënë çdo ditë që prej të Djelës, me humbjet që morën vrull ditën e Premte. Në Bitstamp, vlera arriti në 12,560, duke shënuar rënie me 20% vetëm gjatë ditës. Për javën e plotë, humbi 1/3-ën e vlerës, që është performanca më e keqe që prej Prill-it 2013.
Sipas analistëve, shumë tregtarë e prisnin këtë korrigjim të çmimit. Përveç kësaj, me fundvitin që po afron, shumë investitorë po mbyllin pozicionet për të marrë fitimin.
Ndërkohë që paralajmërimet mbi rrezikun e investimit në këtë treg të parregulluar janë bërë më të zhurmshme, ka patur shqetësime akoma më të mëdha mbi bursat ku blihen dhe shiten kriptovalutat.
Bursa në Korenë e Jugut, “Youbit” deklaroi se do të mbyllet dhe ka shpallur falimentimin, pasi është hack-uar për të dytën herë këtë vit. Ndërkohë që monedhat e tjera ndoqën bitcoin, vlera totale e tregut të kriptovalutave ra në nivel rekord të ulët prej 480 miliardë, tregon faqja në web Coinmarketcap.
Megjithatë korelacioni pozitiv mes valutave është shtrembëruar gjatë javës, me Ethereum që arriti thuajse 900 dollarë nga $500 që ishte javën e kaluar, ndërsa Ripple, që është katërfishuar që prej ditës së Hënë.
Analistët e krahasojnë tregtimin e bitcoin me bixhozin, pasi lëvizjet e vlerës nuk ndjekin një strukturë logjike. Ndryshe nga titujt e kapitalit apo të borxhit, është e pamundur të llogaritet kthimi i pritur për bitcoin, duke i hequr kështu cilësitë e një investimi.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.