Bitcoin ka dështuar si valutë, Carney: Nuk është ruajtës i vlerës dhe nuk përdoret si mjet këmbimi

Guvernatori i Bankës së Anglisë, Mark Carney, ngriti shqetësime mbi luhatjen e dukshme në valutën dixhitale më të njohur.

“Deri më tani ka dështuar në ruajtjen e trajtave tradicionale të parasë. Nuk është një ruajtës i vlerës dhe askush nuk e përdor si një mjet këmbimi”, tha Carney.

Bitcoin është kriptovaluta më e madhe e matur nga vlera e tregut dhe karakterizohet nga rrjeti i decentralizuar blockchain, që mban në mënyrë të vazhdueshme regjistrat e transaksioneve.

Bitcoin është rritur ndjeshëm në 12 muajt e fundit, me më shumë se 900% që nga muaji Shkurt i vitit të kaluar, pavarësisht luhatjes së madhe të vlerës. Autoritetet kanë shprehur shqetësime ndaj kriptovalutave për shkak të luhatjes dhe përdorimit në aktivitete të jashtëligjshme.

Megjithatë, disa vende po konsiderojnë krijimin e monedhave të tyre, për të sjellë një alternativë ndaj parasë. Këtë javë, Venezuela nisi shitjen paraprake monedhës së quajtur Petro, që Qeveria pohon se do të mbështetet nga rezervat e naftës.

Në Suedi, po diskutohet mundësia e një versioni dixhital të kronës, ndërkohë që paraja cash e përdorur në vendin skandinav ka rënë ndjeshëm gjatë viteve të fundit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.