Bitcoin kalon arin, thyen rekord çdo ditë. Pritet miratimi i një fondi të listuar në bursë

Një njësi e vetme e valutës dixhitale Bitcoin ka arritur nivele rekord gjatë kësaj jave, duke kaluar vlerën e një onz ar. Gjatë sesionit tregtar të ditës së Enjte, Bitcoin u rrit në 1263.7 dollarë për një njësi, ndërkohë që ari kuotohej në 1233.3 dollarë për onz.

Përveç kësaj, Bitcoin ka kaluar nivelin më të lartë të të gjitha kohërave, duke iu drejtuar një territori të panjohur. Në vitin 2013, valuta dixhitale preku 1165.9 dollarë, tregojnë të dhënat e Coindesk, nivel ku qëndroi fare pak. Ndryshe nga historiku, Bitcoin po thyen rekord të ri çdo ditë dhe në sesionin e ditës së Premte arriti 1289 dollarë për njësi.

Përveç mbrojtjes nga periudhat e trazirave,  rritja e valutës dixhitale vjen edhe prej pritjeve për miratimin e një fondi të listuar në bursë (ETF). Vendimi nga Komisioni  i Bursave dhe Letrave me Vlerë në Shtetet e Bashkuara, që pritet më datë 11 Mars, do të krijonte për herë të parë një fond të listuar në bursë për Bitcoin.

Sipas Internationa Business Times, më shumë se 100 mijë tregtarë në botë, e pranojnë Bitcoin si formë pagese, përfshirë kompanitë gjigante të teknologjisë si Microsoft dhe Dell.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.