Bitcoin nuk ndalet – Shton 30% në Prill, SEC do rishikojë ofertën për ta listuar në bursë
Valuta dixhitale Bitcoin ka thyer përsëri rekord, duke u rritur me rreth 30% vetëm për muajin Prill.
Në sesionin e parë tregtar të kësaj jave, valuta arriti 1361 dollarë, nga 935 dollarë që shënoi në Mars, kur Komisioni i Bursave dhe Letrave me Vlerë refuzoi kërkesën për një fond të listuar në bursë që ndjek performancën e Bitcoin.
Valuta virtuale ka më shumë se dy javë që tregtohet sipër arit.
Agjencia në SHBA theksoi atëherë se mungon mbikëqyrja dhe rregullimi i tregjeve që ndjekin Bitcoin. Megjithatë, Komisioni i Bursave dhe Letrave me Vlerë ka deklaruar se do ta rishikojë kërkesën dhe një vendim do të merret më datë 15 Maj.
Kjo datë shihet si një udhëzues për drejtimin e valutës, ndërkohë që tregtohet në një nivel që nuk e ka prekur më parë.
Ndikues të tjerë kanë qenë lëvizja e autoriteteve japonezë për të legalizuar valutën dixhitale si një metodë pagese dhe përpjekjet në Rusisë për të bërë të njëjtën gjë. Në fillim të muajit Prill, shitësit me pakicë në Japoni filluan të pranojnë bitcoin.
Zv/Ministri i Financave në Rusi, Alexey Moiseev ka thënë se autoritetet synojnë ta njohin Bitcoin si një instrument financiar ligjor deri në 2018-ën, në përpjekje për të trajtuar pastrimin e parave.
Sipas të dhënave të Coindesk, vlera totale e të gjithë njësive në qarkullim është rritur nga 18 miliardë në 20 miliardë dollarë për muajin Prill.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.