Bixhozi “kurseu” 50 mln USD – Spiropali: Ambientet janë shndërruar në biznese të tjera

Mbyllja e lotove dhe kazinove elektronike nga 1 Janari 2019 u ka kursyer qytetarëve shqiptarë që ishin të varur nga bixhozi, 50 milionë dollarë.

Shifrat janë bërë me dije nga Ministrja e Shtetit për Marrëdhëniet me Parlamentin dhe zëdhënëse e qeverisë, Elisa Spiropali.

Sipas saj, gjatë periudhës Dhjetor 2018 –Janar 2019 janë hapur mbi 2 mijë biznese të reja, dhe shumica prej tyre në ambientet që më parë përdoreshin për loto apo kazino.

Spiropali u ndal tek paketa fiskale dhe lehtësitë për biznes, ku nënvizoi se parashikohet ndikim në punësim dhe formalizim, ndërsa bëri me dije se do të ketë të tjera politika favorizuese për biznesin e vogël dhe të mesëm.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.