Bizneset do zbardhin aksionerët e vërtetë, Bushati: “Pronarët përfitues do pasqyrohen në një regjistër, luftë pastrimit të parave”

Kuvendi ka miratuar të enjten Ligjin që I hap rrugën krijimit të “regjistrit të Pronarëve Përfitues”, ku do të pasqyrohen të gjithë personat që zotërojnë aksione apo kuota në kompanitë që operojnë në Shqipëri.  Projektligji u paraqit në Kuvend nga deputeti i Partisë Socialiste Ervin Bushati, sipas të cilit, ai vjen në paketën me 7 ndryshime të Moneyval për të forcuar luftën kundër pastrimit të parave në vend.

“Me këto dy projektligje që miratojmë sot përmbushim paketën prej 7 ligjesh që Moneyval ka kërkuar nga qeveria shqiptare së bashku me një sërë masash të tjera, që sektori bankar dhe ai financiar të ketë një performancë sa më të mirë dhe të jetë nga vendet edhe më ekselente ndoshta edhe në Evropë.

Kjo është një nga këto iniciativa që jo vetëm na përafron me kuadrin ligjor dhe me detyrimet që kemi për të hyrë në familjen evropian, por vjen edhe në momentin e duhur për të ndihmuar ekonominë dhe financat shqiptare.”

Ligji i ri ka qëllim të identifikohet pronari përfitues, i cili ka qenë i fundit në pronësi ose ushtron kontrollin e fundit efektiv ndaj një personi juridik.

Lorenc Rabeta/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.