Bizneset e mëdha në “sitë” – BSH dhe Financat, plan të përbashkët kundër informalitetit
Kompanitë e mëdha do të jenë fokusi i fazës së radhës kundër informalitetit. Në një deklaratë të përbashkët për mediat Ministri i Financave dhe Ekonomisë, Arben Ahmetaj dhe Guvernatori i Bankës së Shqipërisë, Gent Sejko, bënë të ditur planin e përbashkët për të ulur nivelin e informalitetit, sidomos te sipërmarrjet e mëdha të cilat ende punojnë me dy balance.
Ministri Ahmetaj kërkoi bashkëpunimin e vetë biznesit në këtë proces, duke theksuar fazën e vetëkorrigjimit të tyre.
“Në 2015 në thamë që në 1 janar të 2018-s do të kemi këtë masë të drejtpërdrejtë, pra që banka do të pranojë vetëm bilancet e deklaruara në tatime. Ndërkohë gjatë kësaj periudhe i dhamë të drejtën sipërmarrjes të vetëkorrigjohet pa penalitet, dhe të gjitha këto janë masa lehtësuese, janë masa që ndihmojnë biznesin të formalizohet. Informaliteti është kosto për ta, është kosto për ekonominë, është kosto për buxhetin e shtetit”.
Ndërsa Guvernatori Sejko, duke theksuar se informaliteti dëm ton konkurrencën si dhe është kosto e fshehur për ekonominë, tha se bankat tashmë do të pranojnë vetëm bilancet e paraqitura në tatime.
“Duke që në se bankat kanë filluar ta aplikojnë këtë masë ndër vite, nuk parashikojmë që të ketë pengesë në procesin e akreditimit, përkundrazi bie në linjë me thirrjen që ne u kemi bërë bankave për një kreditim të shëndetshëm, pra për një kreditim të orientuar drejt sektorëve potencial të ekonomisë ku ka më pak risk dhe ku ka më shumë potencial. Kredimarrësit do paraqesin pasqyrat financiare zyrtare, pra nuk do të punojnë me dy standard”.
Shkalla e lartë e informalitetit në ekonominë shqiptare tashmë është e pranueshme nga të gjitha institucionet financiare.
Ndërkohë qeveria ka ndërmarrë disa herë aksione kundër këtij fenomeni. Efektet e tij janë parë në rritjen e numrit të biznesit të vogël të regjistruar, si dhe në numrin e punonjësve të deklaruar.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.